تابعنا على التويتر @hdrmut

ملتقى حضرموت للحوار العربي


العودة   ملتقى حضرموت للحوار العربي > الأقسام الأدبية ( شعر, نثر, قصص, نقد ) > ساحة القصص والروايات

الملاحظات

رد
 
أدوات الموضوع
قديم 09-06-2014, 11:52 AM   #1
طلال الجوراني
كاتب جديد
 
تاريخ التسجيل: Jun 2014
الدولة: مدينة مونكتون / كندا
العمر: 64
المشاركات: 21
طلال الجوراني is an unknown quantity at this point
افتراضي مجمـوعـة قـصص مـن البـادية

قصة بداح العنقري التميمي

بداح العنقري كان امير لثرمداء وكان كريم وفارس وشجاع وكان له هيبته ومعروف عند العرب وكان ايضاً راعي هواء يعني قلبه خضر ههه ويحب الحريم ‘

بداح بحكم انه غني وامير لقرية ثرمداء كانت قبائل الباديه تاتي الى ثرمداء كل عام ليزودهم بلوازمهم ويكرمهم ويدينهم ويردون له السنه الي بعدها وكانت كل القبائل تحبه وتغليه لانه ياقف معهم ويعطيهم الي يبونه المهم انه مره من المرات لفاء عليه شخص من الباديه هو وبنته المزيونه

ولفاء عنده واكرمه وضيفه وعطاه حاجته ‘

الحاصل ان بداح اعجبته البنت ووده انه يطلب
يدها من ابوها بس استحاء انه يقوله وهو ضيف عنده واسكت ولاقاله شي

المهم ان الرجال ودع بداح وراح هو وبنته لقبيلتهم في الباديه
و بداح كان يحسب لهم متى ياصلون لقبيلتهم


يوم اخذله سبوع وتاكد من وصولهم
ويركب بداح فرسه متجه لقبيلة ابو البنت والله وياصل للقبيله

ويلفي على ابو البنت
ولا ابو البنت يستغرب هذا بداح الامير جاي لمي غريبه .!

والله ويرحب فيه ياهلا ببداح ياهلا ومرحبا وهو طبعاء مستغرب كيف امير ثرمداء يجي لمي .!

طبعاء عند العرب قديما الشخص اذا بغاء
طلب مايقوله الا بعد ان يتم ثلاث ايام وهي ضيافته بعد ذلك يقول طلبه

المهم ان بداح
لفاء ضيف عند الرجال كل هالثلاث الايام لانه عنده طلب

وكان كل يوم من ايام ضيافته يطلع اعصير( فترة مابعد الظهر ) ويسون تحدي ابناء القبيله وهي من يرمي الاخر من فرسه

الحاصل ان بداح كل ما يتواجه مع واحد يرميه من فرسه ولاحد قواه والله يوم جاء اليوم الثالث

وهو اليوم الاخير من ايام الضيافه

ويقول بداح لابو البنت انا جايك بطلب قاله امر يابداح

قاله انا جاي اطلب يد بنتك فلانة

قاله والله ابرك الساعات ومن يحصله انه يناسب

شخص مثلك كريم و شجاع وفارس بس حناء بدوا وانت يابداح حظري وعشان كذا لازم اني اشاور البنت طبعا القصد ان بيئة البنت تختلف عن بيئة بداح فهوا نازل للقريه وهي بدويه
المهم ويروح ابو البنت

ويقول لبنته جاك زوج مافيه احسن منه

كريم شجاع فارس

وقالها انه بداح العنقري

وشرايك .؟

قالت البنت يبه غرك الحظري ذاء يومه يغلبكم بالخيول اعصير وتقول انه فارس

قالت بداح زين تصفيح
والقصد من كلامها زين تصفيح اي انه في اللعب رجل اما بالهوش والهواش ما حولك احد

واثاري بداح يسمع كلام البنت لبوها

يوم قالت غرك الحظري هو زين تصفيح طبعاء تعرفون الخيام الحواجز بين الرجال والحريم
ماهيب شي
ستره بس وعشان كذا سمعها بداح المهم والله ويجي ابو البنت

ويقعد مع بداح وهو مستحي مايدري

وش يقوله ماوده يرده

وينطق بداح قبله ويقول الزواج قسمه ونصيب

وماقصرت انت مير ابطلبك طلب

قاله امر

قال ابيك تخليني عندك الى بكره

وبمشي لهلي الصبح

قاله ابو البنت المحل محلك يابداح

وينام بداح ويصبح على ازعاج واصراخ

ويقوم ويتلفت واثاري القبيله جاهم عزو

غزوهم الفضول من بني خالد

ويقمون ارجال القبيله ويواجهونهم

وبداح ضيف طبعاء مايلزمه شي

ويجلس ويتقهوى ويتفرج والبنت تقوله

والله اني قايله لبوي انك زين تصفيح ماتنفع

وهو الي ما عطاها وجه

الحاصل ان رجال القبيله مع العصر ارجعوا

واجتمعوا يتحسرون انهم انغلبوا وراح كل الي عندهم

والله ويجي بداح ويقولهم هاه اغلبوكم قال ايوالله يابداح

انهم واجد وغلبونا

قال طيب وياخذ سيفه ورمحه ويركب بداح فرسه

وينطلق لحاله يلحق القبيله الي غازيه على قبيلة ابو البنت

والله ويستغربون يقولون وشلون بيقواهم لحاله

عز الله انهم بيذبحونه

ويترحمون عليه مقدما

والله يوم جت حزت مسيان قبل المغرب بشوي

الا ويشفون اغبره من بعيد

وش ذا يرجال غزوا بعد

اثاريه بداح راجع ويسوق حلالهم

كله بعارين وغنم

وراجع لهم

ويستغربون بداح وحده رجع حلالهم كله

وغلب القبيله الثانيه

يوم شافت البنت فعل بداح الي ماحد سواه

قالت لبوها مابي الا هو يحرمون علي الرجال غير بداح

وتروح لبداح وتقوله بداح انا وافقت على الزواج

منك

يقول ابداح

خلاص عافك الخاطر انا مابيك


ويقول هالقصيده التاريخه الي الا يومنا تردد


وهذي القصيده


الله لحـد يـا مـا غـزينـا وجينـا
ويامـا ركبنـا حاميـات المشاويـح


ويامـا علـى أكـوارهـن اعتلينــا
ويامـا ركبناهن عصيـرن مراويـح



ويامـا تعـاطـت بالهنـادي يدينـا
ويامـا تقاسمنـا حـلال المصاليـح



وراك تزهـد ياريـش العيـن فينـا
تقـول خيال الحضر زيـن تصفيـح



الطيـب مـا هـو بـس للظاعنينـا
مقسمـن بيـن الوجيـه المفـاليـح



البـدو واللـي بـالقـرى نازلينــا
كلـن عطـاه الله من هبَّـة الريـح



يـوم الفضـول بحلتـك شـارعينـا
بالشلف ينحونـك سـوات الزنانيـح



يوم انجمر رمحي خذيـت السنينـا
وادعيت عنك الخيل صـمّ مدابيـح



هيـا عطينـا الحـق هيـا عطينـا
وإن مـا عطيتينـاه والله لا صيـح



أصيح صيحـة مـن غدالـه جنينـا
وإلا خلوجن ضيعوهـا السراريـح



يا عود ريحانـن بعـرض البطينـا
ومنين ما هب الهوا فاح لـه ريـح


لا خـوخ لا رمـان ولا هو بتينـا
مشمـش البصـرة ولا بالتـفافيـح


وخـدن كما قرطاستـن في يمينـا
وعيـون نجـل للمشقـا ذوابيــح



صخـف بلطـف بـانهـزاع بلينـا
يا غصن موزن هزعه ناسم الريـح





يقال ان الفتاة ماتت من حبها لبداح

قصة منقولة من أحد المواقع .
طلال الجوراني غير متواجد حالياً   رد مع اقتباس
رد

مواقع النشر

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع إلى


جميع الأوقات بتوقيت GMT +3. الساعة الآن 03:49 AM.


Powered by vBulletin® Version 3.8.9
Copyright ©2000 - 2019, Jelsoft Enterprises Ltd.
جميع الحقوق محفوظة لشبكة حضرموت العربية 1999 - 2009م